في البلكون

this photo by JANINE GATES PHTOGRAPHY

السلام عليكم ورحمة الله وبركاته

البلكون - الفرندة (البرندة أحياناً) - التراس .... كلمات تدل حسب اعتقادي الخاص على نفس المكان في الشقة أو البيت او الفيلا

المكان اللي بتشوف منه كل ما هو خارج البيت من حولك

اللي جربوا يصلوا الفجر ويفضلوا صاحيين بعدها مش يناموا هيعرفوا الاحساس اللي عاوز اتكلم عليه النهاردة

لما تصلي الفجر وتروح البيت تقعد ف البلكونة وتشرب الشاي أو القهوة أو النسكافيه على الريق وتشاهد شروق الشمس في صورة إبداعية من المبدع - سبحانه وتعالى - ولا أروع منها صورة

تشوف الأطفال وهما خارجين من بيوتهم ورايحين المدرسة

تشوف الراجل البسيط خارج بيلمع التاكسي علشان يبدأ لعبة الشقا والجري على الرزق

مع أول اطلالة نور كل صباح تلاقي صور مشرقة للسعي والعمل

تعليم (مدارس وجامعات) - عمل (موظفين و عمال وطوائف الشعب) - وأمهات

أمهات تخرج في وداع أبناءها وأزواجها - وأطفال أيضاً ممكن يكونوا صاحيين الصبح بدري

وترى إمام الفجر وهو عائد إلى منزله بعد أن صلى صلاة الضحى في مصلاه ليكسب حج وعمرة تامة تامة تامة كما أخبرنا الرسول صلوات ربي وتسليماته عليه وبعد قليل تجده يخرج في زي العمل لا في زي الشيخ الامام ليقدم لنا هو الآخر نموذجاً للعمل والعبادة

ويقول لنا ببساطة الدين مش معناه جلوس ف المسجد طول الليل والنهار وندعي ربنا وهو هيرزقنا من عنده .... لإن ده اللي اسمه التواكل مش التوكل كما قال عمر بن الخطاب

كل هذه الصور والأفكار تأتيني يومياً وأنا أجلس أتأمل في هذا الكون البديع على الريق

والحمد لله إنها بتبقى كده على الريق لإننا لما بنوصل لنص اليوم بتلاقي الصورة بهتانة كتير عن الأمل اللي بدأت بيه

ولكن يبقى الأمل في يوم آخر مشرق يصحبه عمل وجد ورسالة